maart 10, 2022
fan Viktor Safonkin*
As gjin begrutsjen út ’e rots
delkomt, mar stiel de kop opstekt
mei kettings om te binen,
messen foar de teare hûd,
dan wit men dat de hel losbrekt.
Wannear it leger by de berch
delkomt, in rige sûnder ein,
gjin doekjes om te winen,
mar mei wapens foar it bloed,
dan reagearret men ferslein.
Mar net as ’t bloed troch ieren streamt
streekrjocht ferbûn mei hiel it hert
dat iepenstiet foar ’t libben
fan it teare bern yn noed,
dan hat de ingel dêrmei ret.
Har wjukslach rûzet tsjin geweld
in widzesankje foar it bern
as middel tsjin in trauma,
driigjend mei syn duorjend lûd…
bern ha de ingel as har fan.
* Viktor Safonkin
Skilderij ‘Beskermingel’
maart 9, 2022
fan ûnbekend*
Jeremia
Ik ha in fraach oan Israel:
wie ’t ûnrjocht om it folk
dat foar jim wie, te lieden
út Egypte wei troch de woestyn?
Sa’n oard hat neat te bieden.
Ik ha dat folk doe fierder brocht
nei hôven mei de frucht
dy’t goed is om te iten,
mar se fregen net: ‘Wêr is de Hear?’
Oerdwealsk is dêryn biten.
’t Is wurden ta in folk fan neat
mei prysters sûnder fraach
oan My, profeten ûnder
ynfloed fan de god dy’t Baäl hjit,
Ik wie net mear bysûnder…
… as God dy’t rjocht docht oan syn folk,
gjin ûnrjocht oansjen kin,
dus sil Ik dêrtsjin stride
troch dat folk te roppen ta it pleit,
dat sil ta ’t fonnis liede.
* Foto ‘Woestyn’