maart 19, 2022
fan ûnbekend*
Jeremia
Do seist datst frij fan bannen bist,
net bûn oan watfoar god dan ek,
dyn frijheid hâldt lykwols net oer,
want oeral leisto op ’e rêch,
fan Baäl bist de hoer.
In wyngerd wiesto yn ’t begjin
mei ranken fan in suver soart,
dyn druven waarden wyld en min.
Mei sjippe woskst dyn goare hûd,
hoewol’tst dêr rij genôch mei wiest,
sjoch Ik dyn smoargens likegoed.
As kamielinne yn de draai,
in ezelinne yn it wyld,
sa folgesto dyn ôfgod nei.
Dyn sizzen is dat it neat let,
want frij wolst wêze yn dyn dwaan,
dyn frijheid hâldt lykwols net oer,
gleon bisto op in frjemde god,
fan Baäl bist de hoer.
Yllustraasje ‘Baäl’
maart 18, 2022
fan Jan de Bray*
Wa’t de wet jout, wit net yn it foar
de konsekwinsjes fan de regel,
dy’t dochs jildt foar elkenien
en net allinnich foar de oar.
Troubrek kaam yn Grikelân faak foar,
wa seach himsels dan yn de spegel?
Brekkers ha dat selden dien,
sy folgen domwei ’t âlde spoar.
’t Wie Zaleukos dy’t dêr wat oan die,
de wet oer troubrek kriich syn segel:
wa’t net oan de wet foldie,
ferlear de eagen troch dy die.
Doe’t Zaleukos’ soan de trou ferbriek,
wie dat foar heit in grut dilemma,
as famylje wist er rie:
net blyn, wylst ien wol twa kear stiek.
Stutsen waard sawol by heit as soan,
sadat de soan ien each behâlde
koe, hy wie net elkenien,
foar beide kaam it derop oan.
* Jan de Bray (sirka 1627-1697)
Skildering ‘It oardiel fan Zaleukos’