maart 18, 2022
fan Jan de Bray*
Wa’t de wet jout, wit net yn it foar
de konsekwinsjes fan de regel,
dy’t dochs jildt foar elkenien
en net allinnich foar de oar.
Troubrek kaam yn Grikelân faak foar,
wa seach himsels dan yn de spegel?
Brekkers ha dat selden dien,
sy folgen domwei ’t âlde spoar.
’t Wie Zaleukos dy’t dêr wat oan die,
de wet oer troubrek kriich syn segel:
wa’t net oan de wet foldie,
ferlear de eagen troch dy die.
Doe’t Zaleukos’ soan de trou ferbriek,
wie dat foar heit in grut dilemma,
as famylje wist er rie:
net blyn, wylst ien wol twa kear stiek.
Stutsen waard sawol by heit as soan,
sadat de soan ien each behâlde
koe, hy wie net elkenien,
foar beide kaam it derop oan.
* Jan de Bray (sirka 1627-1697)
Skildering ‘It oardiel fan Zaleukos’
maart 17, 2022
fan Jean-Léon Gérôme*
It nôt dat yn de rûnte leit,
kaam op út goede grûn,
oerstreamd mei wetter fan de Nyl,
de boer liet dêr syn each oer gean
en rûsde… ’t wie genôch foar syn bestean.
Hy bleau net by de opbringst stean,
mar meande oant de jûn,
lei dêrnei kreas in rûnte oan
en helle doe de terskers op,
blynkapen krigen beide op ’e kop.
Sy moatte oeren derfoar gean,
gjin poat komt bûten ’t nôt,
de rûnte jout de fêste koers,
gjin bek krijt fan de boer de kâns,
hy hâldt de terskers draaiend yn balâns.
Sels bliuwt er op syn plakje stean,
al draaiend mei de stap
fan beide terskers foar it lean.
* Jean-Léon Gérôme (1824-1904)
Skilderij ‘Nôt trêdzje yn Egypte’