maart 27, 2022
fan ûnbekend*
fan ûnbekend**
Fan Marioepol nei Katyn,
dêr’t fiifentweintichtûzen
skotten klonken yn it stille bosk
foar boargers, prysters, militêren,
inkeld blêden ha doe rûze.
Al tachtich jier is it ferlyn
dat mear as fjouwertûzen
offisieren yn it stille bosk
it libben lieten troch de kûgel,
inkeld blêden ha doe rûze.
Noch klaget yn it bosk de wyn
de Russen oan yn plante
beammen op it stille massagrêf
fan Poalen dy’t ûnskuldich stoaren,
’t gûlen kaam fan alle kanten.
Nei Marioepol fan Katyn
út kin men gean yn tinzen;
knallen klonken yn de stoarne stêd
foar boargers, prysters, militêren,
oarlochslûden gean oer grinzen.
* Foto ‘Massagrêf yn Katyn’
** Foto ‘Bombardearre teäter yn Marioepol’
maart 26, 2022
fan ûnbekend*
Jeremia
Jim geane tsjin my yn de pleit,
sa is de godsspraak fan de Hear,
en sprekke jimme ûnskuld út,
mar ’t bloed fan minsken sûnder skuld
dript út ’e seamen fan jim klean.
Mar wat tsjin jimme ûnskuld pleit:
myn folk is mei myn grime klear,
tinkt dat dy fan him ôfkeard is,
fergees ha Ik jim soannen slein,
jim bleauwen op jim stânpunt stean.
Fergetten bin Ik, ‘t is in feit
dat gjin jongfaam har sier ferjit,
sa witte jim ek skoan it paad
nei huorkerij, dus is ferlein
de wei dy’t wiisd is om te gean.
De oare wei dy’t jim wat seit,
is nei Egypte ta, fergees,
dêr komme jim beskamme wei,
dat lân is ek net sûnder skuld,
dêr dript it bloed fan djoere klean.
* Foto ‘Paad’
