april 3, 2022
fan ûnbekend*
Wylst Ingelân bedrige wurdt
mei Dútske bommen op ’e stêden,
is Winston Churchill, de premier,
yn Moskou om mei Stalins help
Europa fan de dea te rêden.
Sjoch him dêr mei syn swarte hoed,
it each strak op ’e militêren
dy’t weagje oan de macht foarby
nei ’t slachfjild mei de pas deryn
om foar Europa dêr te stjerren.
Gjin sprake fan dat hjoed de dei
yn Moskou Poetins militêren
marsjearje foar Europa’s macht,
sy fjochtsje dôf en ek noch blyn
om Kremlins faaie ear te rêden.
Foto ‘Winston Churchill yn Moskou’
april 2, 2022
fan ûnbekend*
Jeremia
Twa susters lykje op elkoar,
net inkeld oan de bûtenkant,
ek yn it hâlden en it dragen,
de iene hat wat fan de oar.
Nim earst dy suster Israel,
sy huorke om mei elke klant,
die ’t ûnder beammen, op ’e heuvels,
dêr kaam it by har tsjinst op del.
Dan suster Juda, dy’t dat seach,
mar keas net foar de oare kant,
hoewol’t Ik Israel ferstjitten
hie, ek har suster hie it each…
… op huorkjen mei wat hout en stien
is, besmoarge sa it lân
en seach Ik net wer by My kommen,
dy beide susters wiene ien.
* Yllustraasjes ‘Twa susters’
