april 23, 2022
fan ûnbekend*
Jeremia
Harkje nei it nijs út Dan,
nei ’t boadskip oer it ûngelok
dat komt fan berchlân Efraïm:
‘Meitsje dit de wrâld bekend:
it ûngelok dat rôlet oan
oer bergen nei Jeruzalem.’
Lit oan Juda witte dat
syn hâlden en syn dragen mis
is, bitter sil it him fergean.
Sjoch wat opkomt as in wolk
fan legerweinen nei de stêd
mei hynders, rapper as in earn.
Lit Jeruzalem syn hert
wer suver wurde, want it kwea
sprekt op, oerhearsket elke stim.
* Yllustraasje ‘Striidweinen’
april 22, 2022
fan ûnbekend*
Hy waard net trochslokt troch syn heit,
lykas fiif oare bern fan Kronos,
want de mem ferburch har soan,
dy’t grutbrocht waard troch nimfen,
holpen troch de molke fan in geit.
As jonge briek er ôf in hoarn
as teken fan in striidber libben,
dronken fan it goademiel
mei ambrozyn en nektar,
hoarn fan oerfloed foar de goadesoan.
Heech op Olympos stie syn troan,
dêrwei seach Zeus de hiele ierde
oer mei yn de hân in pylk
dy’t flitste as de bliksem,
dêrmei rekke hy it minskdom oan.
As haadgod keas hy froulju út
yn wa’t er ’t sied oerfloedich struide,
wat brocht mei in leger bern
op ierde en Olympos…
Zeus seach ’t oan, ’t wie neffens syn beslút.
Byld ‘Zeus’