mei 2, 2022
Fyts of brom der net trochhinne,
wat fersteurt in pril gelok,
it is ferbean om jacht te meitsjen
op ’e guozzen, lit se feilich rinne.
Rinne om fan ’t gers te fretten
yn de berm, deun by de dyk,
se litte it har lekker smeitsje
sûnder har te steuren oan ús wetten.
Wa ferbiedt har om te lizzen
aaien folle net genôch?
Se sille oer har berntsjes weitsje,
oer it tal ha âlders it te sizzen.
Sjoch ris hoe’t sy dêr no swimme,
dûbelop as pril gelok,
se kinne om it frjemd gean laitsje,
sille moarn wer by de wâl opklimme.
mei 1, 2022
fan ûnbekend*
fan ûnbekend**
De myte giet de skiednis troch:
Creon en Antigone,
de kening mei syn strange wet
en Antigone dêr tsjinyn,
fan dy frijheid is no noch ferlet.
De Frânske skiednis lit it sjen:
’t Vichy-regear mei Hitler
as teken fan de strange wet
en Antigone dêr tsjinyn,
sa hat frijheid it úteinlik ret.
De myte libbet no ek noch:
de Rus en Oekraïne,
de wet dy’t opropt ta geweld,
de frijheid giet dêr rjocht tsjinyn,
wat de skiednis mannich kear fertelt.
* Yllustraasje ‘Creon’
** Yllustraasje ‘Antigone’
