mei 12, 2022
fan Peter Paul Rubens*
Har skientme koe wol sprekken lije,
spriek de kening oan fan Ingelân,
dy’t har ornearre foar syn soan,
hy skonk har withoefolle fammen…
gie sy wol in heidensk houlik oan?
Sy foer mei withoefolle skippen
mei har fammen fan stêd Keulen nei
de paus; in ingel spriek har oan:
‘Do komst werom yn Keulen, krigest
fan it himelfolk de martlerskroan.
De wrede Hunnen kamen earder,
sleaten Keulen en de fammen yn,
begiene in massale moard,
sa waard ek Ursula fermoarde…
mei de martlerskroan kaam sy oan board.
* Peter Paul Rubens (1577-1640)
Skilderij ‘Hillige Ursula wurdt martele’
mei 11, 2022
fan ûnbekend*
Jeremia
De soannen hawwe My ferlitten,
rinne wielderich as hynsten om
en wrinzgjend achter buormans wiif oan,
gjinien kin ’t huorkjen litte.
Soe Ik soks net op har ferhelje?
Om har dwaan en litten nim Ik wraak,
ferrinnewearje harren ikkers,
sy sille ’t sa betelje.
It giet mei ’t kwea om beide soannen:
’t folk fan Juda en fan Israel,
sa is de godsspraak fan de Heare,
yn plak fan druven toarnen.
Hy docht ús neat, wie harren sizzen,
wy belibje kriich noch hongersneed
en harkje net nei de profeten,
har wurd sil nimmen misse.
* Foto ‘Hynsten’