mei 27, 2022
fan ûnbekend*
fan ûnbekend**
Se dobberje allinnich mar,
de swannen mei in swarte kop,
dy’t libben der net wêze kinne
of ’t moast wêze út ’e tiid
fan reuzefûgels, fier foarhinne.
De swannen driuwe op ’e mar
foar bern, sy sitte dêr grutsk op,
al fantasearjend dat sy klimme
nei Osorno, de fulkaan,
dêr’t gletsjers yn de sinne glimme.
Osorno stekt syn kop heech op
en spuit soms fjoer en jiske út,
feroaret snie, lit wetter rinne
by de helling del, de mar
yn, dat de swannen hichte winne.
De sylboat slacht foar master op
en soeverein de wjukken út,
wylst stive swannen net iens swimme
kinne… foar de boat rom baan
om mei de wyn ’t derfan te nimmen.
* Foto ‘Fulkaan Osorno yn Chily mei swannen’
** Foto ‘Fulkaan Osorno mei in sylboat’
mei 26, 2022
fan Gerard Dou*
Opsletten yn de djipte,
dêr’t it tsjuster waret om
de beam en dêr’t de stilte sprekt
fan hege kontemplaasje,
giet de klúzner troch foar from.
Hy sakket troch de knibbels,
kreakjend fan syn âlderdom
en sprekkend fan ûntsach, stekt hy
de hannen út ’e mouwen
om sa troch te gean foar from.
Him wurde wijde wurden
jûn, dêr bûcht it boek fan krom,
swiermoedich sprekke dy him oan,
’t rint út op meditaasje,
wat beskôge wurdt as from.
De dea sjocht him mei holle
eagen oan, ’t giet Kristus om
it folgjen fan de smelle wei,
op ’t krús folslein fertrouwe
giet op knibbels troch foar from.
* Gerard Dou (1613-1675)
Skilderij ‘Biddende klúzner’