mei 28, 2022
fan ûnbekend*
Jeremia
De Heare:
Bliuw op ’e fjouwersprongen stean,
sjoch út oer alle paden
wat de goede wei foar ’t folk is,
dy sille jimme gean.
Folk:
Mei eigen wegen is neat mis.
De Heare:
De wachters dy’t Ik oer jim steld
ha, seine: ‘Harkje nei ús
hoarnsinjaal!’ Wat dêrnei bard is,
it folk hat him net meld.
Folk:
Mei eigen earen is neat mis.
De Heare:
Dus heidenfolken, harkje goed,
de ierde moat ek harkje
nei de tiding dy’t foar ’t folk is,
it komt yn neare noed.
Folk:
Mei eigen fynsten is neat mis.
De Heare:
Der komme stiennen op ’e wei
foar ’t folk om oan te stjitten,
sa’t Ik oanstjit nim oan wat mis
is mei wat bart oerdei.
Folk:
Mei eigen offers is neat mis.
* Yllustraasje ‘Fjouwersprong’
mei 27, 2022
fan ûnbekend*
fan ûnbekend**
Se dobberje allinnich mar,
de swannen mei in swarte kop,
dy’t libben der net wêze kinne
of ’t moast wêze út ’e tiid
fan reuzefûgels, fier foarhinne.
De swannen driuwe op ’e mar
foar bern, sy sitte dêr grutsk op,
al fantasearjend dat sy klimme
nei Osorno, de fulkaan,
dêr’t gletsjers yn de sinne glimme.
Osorno stekt syn kop heech op
en spuit soms fjoer en jiske út,
feroaret snie, lit wetter rinne
by de helling del, de mar
yn, dat de swannen hichte winne.
De sylboat slacht foar master op
en soeverein de wjukken út,
wylst stive swannen net iens swimme
kinne… foar de boat rom baan
om mei de wyn ’t derfan te nimmen.
* Foto ‘Fulkaan Osorno yn Chily mei swannen’
** Foto ‘Fulkaan Osorno mei in sylboat’
