juni 3, 2022
fan Rembrandt*
Jeremia
De Hear liet Jeremia witte:
‘Gean yn de poarte fan de timpel stean,
dêr silst myn boadskip witte litte’:
‘Wa’t troch dizze poarte komme
om de Heare te oanbidden,
harkje nei it wurd fan God:
As jimme dogge sa’t it heart,
dan bliuwt dit stee foargoed jim plak
en is it falske lûd ferstomme:
de timpel bliuwt Gods ûnderdak!
Mar Juda’s dwaan en litten kin
folslein gjin sprekken lije:
stelle, moardzje en troubrekke,
falske eden dwaan en Baäl eare jaan
en dan myn seine krije
yn de timpel dêr’t Ik bin,
sa’t jimme tinke, mar ferjitte
dat Ik jim praktiken sjoch.
Wannear’t jim gean nei Sjilo,
sjogge wat ik dien ha mei myn stee
dêr, dan kinne jim wol witte
wat Ik dwaan sil mei de timpel hjir!’
* Rembrandt (1606-1669)
Skilderij ‘Jeremia treuret om de timpel’
juni 2, 2022
fan Gerard van Honthorst*
Sy hat de bút al binnen
foar’t har finger wiist nei him
dy’t mei syn ponge krekt begjint
te jeien op syn bleate bút…
kin sy him noch ûntrinne?
Sy spile op ’e lute
leafdeslietsjes, net foar him
bedoeld, mar as it sa ferrint
as by syn komst, dan kin it út
en is neat út te sluten.
Hy biedt har hert en sinten,
kombinearjend mei syn stim
sil hy it rêde, hy fersint
him net, it bliuwt net by in tút,
hy krijt ferskate hinten.
Har finger bliuwt mar wizen,
wylst syn fingers sizze: ‘Nim,
dan sjogge wy wol hoe’t it rint.’
Sy bûcht de holle, resolút
lit sa har foarhang rize.
* Gerard van Honthorst (1592-1656)
Skilderij ‘De keppelster’