juni 10, 2022
fan ûnbekend*
De mar as spegel fan de bergen,
fredich yn frij Switserlân,
hjit wolkom folk fan fier en hein,
is earder troch de oarloch terge.
De mar as fijân fan de naasje:
’t grutte Habsburch tsjin it lân
dat frede mei syn bergen hie,
’t stried moedich yn konfederaasje.
De mar seach ’t lytse leger winnen,
spegele de nije steat
mei bergen oeral yn it rûn,
ferdigening om Switsers hinne.
De mar as spegel fan it libben,
spegel ek fan de toerist
dy’t him ferdjippet yn it lot
fan ’t lân dat nei de frijheid stribbe.
* Foto ‘Mar fan Ägeri’
juni 9, 2022
fan Jacob Backer*
Hjir bin ik, mar net allinne,
sjoch mar hoe’t ik nei him wiis,
hy is de jager, giet op jacht,
wylst ik hjir sit te flechtsjen
in krânse foar de priis.
Sjoch my hjir as harderinne
mei de glim fan makke skiep,
sa wol ús heit my ’t leafste sjen,
mem learde my it flechtsjen,
wat hâldt my út ’e sliep.
Sjoch nei him, hy bliuwt wol wekker,
mem seit: ‘Om’t hy jonge is,
moatsto him as de jager sjen,
hy sil net daliks flechtsje,
sjit mei syn spear nea mis.’
Hjir bin ik, sekuere rekker,
’k reitsje mei myn spear de knyn
en fang in klyster mei myn strûp,
ik lit gjin bist mear flechtsje…
as ’t moat sjit ik in swyn.
As it moat, sil hy it winne,
dêrom is ’t dat ’k nei him wiis
as jager, winner fan de priis.
* Jacob Backer (1608/9-1651)
Skilderij ‘In jonge en in famke
as harderinne en jager’