juni 12, 2022
fan ûnbekend*
fan ûnbekend**
Sjoch him wiidskonkich stean:
Colossus, ’t kolossale byld,
dat opnimt wa’t der ûndertroch giet,
neat bliuwt foar him ferburgen,
hy is wach fan top oant tean.
Gjin fijân seach him stean:
Colossus, de kompjûter dy’t
berjochten opnaam yn de oarloch,
neat bleau foar him ferburgen…
as ’t each fan fûgel Earn.
Colossus’ each siet yn
’t systeem fan elektroanika,
hy koe dêrmei de koade kreakje
fan wat de Dútsers stjoerden,
mar dat is al jierren lyn.
Colossus’ each sit hjoed
ferburgen yn de satellyt
dy’t Oekraïne helpt tsjin Ruslân,
lyts lantsje tsjin Colossus,
kolossaal ferjit ek bloed.
* Yllustraasje ‘Colossus op Rhodos’
* Foto ‘Colossus de kompjûter’
juni 11, 2022
fan Pieter Lastman*
Ik hear de Hear noch sizzen
dat gjin inkeld offer foarskreaun is,
mar dat it folk om sizzen jout,
altyd de wei giet dy’t Hy wiist,
want it moat oan dwaan en litten lizze.
Mar ’t folk liet net it rinnen
achter goaden oan, rûn net de wei
dy’t wiisd wie en soe ek net nei
my harkje as profeet dy’t sels
wiisd wie hoe it folk werom te winnen.
Ik moast myn hier ôfknippe,
daliks koe dit wijingsteken fuort,
doe sette ik in kleisang yn:
‘Dit folk is foar de Hear in griis,
’t is ferstjitten lykas goare drippen.
Ik hear de Hear noch sizzen
dat gjin berne-offer easke wurdt,
lykas it folk oan goaden jout;
yn Sion is it grau en griis,
wylst de strjitten der stil hinne lizze.
* Pieter Lastman (1583-1633)
Skilderij ‘Heidensk offerje’