augustus 14, 2022
fan ûnbekend*
fan ûnbekend**
Charismatysk wurdt der sein,
dy Adolf mei syn boarstelsnor,
en prúkje, donker sûnder krol,
in keardel, tsjuster fan gewisse,
’t is him yn de plasse slein.
Redenryk, sa wurdt der sein,
dy Hitler mei syn breed gebeart,
it blaffen lykas fan in hûn,
neat wol de nazi dêrfan misse,
gif taast oan it wiffe brein.
Charismatysk, redenryk,
hystearje bringt it folk ta neat
oars as oanbidding fan in dweil;
wa’t oars tinkt, mei dat net mear sizze,
want de massa hat gelyk.
Massa’s dweilen hingje slop
mei heakkekrusen oan in stôk,
as út ien mûle klinkt: ‘Sieg heil!’
De koppen heech, wa’t ûnder lizze,
wurde ombrocht op syn rop.
* Foto ‘Rede fan Adolf Hitler’
** Foto ‘Massagearkomste’
augustus 13, 2022
fan Thomas Moran*
Jeremia
Wês net te grutsk foar iepen earen,
want de Hear is dy’t no sprekt
en rjochtet op syn folk de eagen,
jou oan Him as God de eare.
Ik sjoch jim oer de bergen rinnen,
fuotten stjittend tsjin in stien,
omdat jim dy net lizzen sjogge,
want de nacht ferdriuwt de sinne.
As jim net nei my harkje wolle,
gûl ik om jim grutske hert,
myn eagen rinne oer fan triennen,
jimme gean wurdt my tefolle.
Sis tsjin de kening dat hy sitte
sil op ’t plak dat is foar him
bestimd, dat foar in kening leger
is as tsjinners witte litte
Ynsletten binne alle stêden
yn it Suderlân, gjinien
kin dêr noch yn of út, as balling
wurdt gjin minske troch Him rêden.
* Thomas Moran (1837-1926)
Skilderij ‘De grutte blauwe boarne’