oktober 23, 2022
fan ûnbekend*
fan ûnbekend**
Nasjonalist of kommunist,
it gie yn Sina om de macht,
Tjiang of Mao, wa soe winne…
gie it om it heitelân
of… sjoch my as egoïst?
Lit Tjiang mar foar de naasje gean,
want dan komt Sina ta syn rjocht,
foar Mao is in wrâld te winnen
bûten ’t eigen heitelân,
elkenien deselde klean.
De lange mars fan Mao dreau
syn fijân oer it wetter nei
Taiwan, it eilân as it twadde
Sina, ’t eigen heitelân…
der is sprake fan in kleau.
Nasjonalist en kommunist,
it giet yn Sina om de macht,
Xi Jinping ferneart gjin twadde,
’t giet om hiel it heitelân…
kommunistysk egoïst.
* Foto ‘Mao Zedong’
** Foto ‘Xi Jinping’
oktober 22, 2022
fan ûnbekend*
Jeremia
Sprekke moast ik as profeet
tsjin ’t keningshûs, heech op ’e rots,
yn earder tiid it hûs fan David,
kening nei it hert fan God.
Hie it folk dêrfan noch weet?
Yn elk gefal syn kening net,
dus moast ik sprekke fan Gods oardiel,
want foar him wie ’t al te let.
Nee, de kening spriek gjin rjocht,
ferloste net út fijâns macht,
dus moast ik hurde wurden sprekke…
as profeet kriich ’k gjin ûntslach.
Sa hat God it oardiel tocht:
de foarst komt fan syn hege rots
en wachtet bevend yn de delling
op wat wurdt syn nuodlik lot.
Lean nei wurken wurdt it lot.
it ûnlân om de stêd ferbrânt,
it fjoer sil ’t keningshûs fertarre,
dat it bringt neat mear ta stân.
* Foto ‘Fertarrend fjoer’