november 17, 2022
fan Francisco José de Goya*
Hjir stean ik dan yn fol ornaat,
Francisco José de Goya,
mei yn de linker it palet,
de rjochter strykt mei it pinseel
de kleuren op it skilderij,
sa kom ik steande op ’t portret.
Myn eagen binne rap paraat
as bûten wat te rêden is
wat my rûch rekket yn it moed,
it drama komt dêrnei op doek,
sa kleurje ik de werklikheid,
dy’t sjen lit wat der floeit oan bloed.
It is net oars, ik kriich as maat
de bril, myn eagen waarden min
fan ’t sjen wat kaam op ’t selde del:
ellinde yn de maatskippij,
dy’t kleure mannich skilderij…
op ierde is it faak in hel.
* Francisco José de Goya (1746-1828)
Skilderij ‘Selsportret yn it atelier’
Skilderij ‘Selsportret’
november 16, 2022
fan ûnbekend*
Jeremia
De útspraak fan de Hear
wol ’t folk perfoarst net hearre,
it heart allinnich wat it hearre wol
en is dêrmei de Hear ta lêst.
De wurden fan de Hear
ha ’k as profeet wurdearre
en trochjûn oan it folk, sa’t Hy dat wol,
mar ’t joech my neat, allinnich lêst.
De útspraak fan de Hear
oer lêst wurdt no ferklearre:
syn wurd is stjerrend wier, de mjitte fol,
it folk fernimt de swiere lêst.
Yllustraasje ‘Lêst’