december 10, 2022
fan ûnbekend*
Jeremia
Lykas in okse syn sylbeage
draacht, sa sil de grutske foarst
fan Edom, Moäb, Tyrus, Sidon
dy ek drage ûnder hearskippij
fan Babels grutte kening.
Dit moast ik bringe ûnder eagen
fan gesanten út it lân
fan Edom, Moäb, Tyrus, Sidon,
want dat boadskip brocht de Heare my,
dus tsjinje Babels kening.
De God fan Israel hat sprutsen
oer de skepping: út syn hân
kaam al wat op ’e ierde libbet,
alles sil Hy oan de kening jaan
dy’t hearsket yn grut-Babel.
It folk dat mei Gods wurden brutsen
hat, net harket nei de foarst
fan Babel, wurdt swier straft mei oarloch,
honger en de pest, ’t is út syn dwaan
en jout him oer oan Babel.
* Foto ‘Sylbeage’
december 9, 2022
fan ûnbekend*
De Grykske seelju koene mear
as sile oer de Middellânske See,
sy bouden muorren op ’e kust,
wat yn Dubrovnik resultearre,
stêd fan mear as ierdske sfear.
In Ierske skriuwer fan toaniel,
dy’t sunich mei syn kompliminten wie,
skreau oer de stêd as wie ’t in lust
foar eagen: himel op ’e ierde,
want Dubrovnik hie in siel.
De siel spriek tusken see en lân
oer seelju mei in each foar rûn en rjocht,
lykas de brâning op ’e kust,
wat resultearre yn Dubrovnik,
weach en stien yn hecht ferbân.
* Foto ‘Alde haven fan Dubrovnik’