december 12, 2022
It kin noch net, it giet net oan
om al foar winternocht te gean,
de guozzen litte noch net witte
dat Rûchburd no yn oantocht is,
lit stean dat hy sit op syn troan.
It wie net wiet genôch fan ’t hjerst
foar winterdeis in heger peil
sadat it bûtlân ûnder wetter
strûpt, Rûchburd kin syn gong dan gean
en fiert sa út de earste test.
It iis ferliest it fan it grien,
dat oeral heech de kop opstekt
om iere riders op te kearen,
de test kin Rûchburd no net dwaan,
men sjocht op ’t bûtlân noch gjinien.
december 11, 2022
fan Nicholas Habbe*
De Britten ha regearre
oer de weagen fan de wrâld,
mar ek oer berch en oer woestyn,
in ryk fan hjit en kâld.
De Britten ha Egypte
makke ta protektoraat,
beskermen foar harsels de Nyl
en hiene dêrby baat.
Oertsjûge wiene Britten
fan de hillichheid fan ’t lân
fan beide: Joad en Palestyn…
hâld stân mei hurde hân!
Egypte fielde neat mear
foar beskerming troch de Brit,
optearde foar in eigen styl,
net kâld, mar inkeld hjit.
Sa rekke Palestina
ek oertsjûge fan ’t idee
dat hurde hannen sloegen kâld
ta, dus de Brit op see!
* Nicholas Habbe (1827-1889)
Yllustraasje ‘Britannia rules the waves’