december 18, 2022
fan ûnbekend*
fan ûnbekend**
Hoefier ha Romeinen rûn
nei Jarrow yn Noard-Ingelân
om dêr in fort te bouwen
dat fertelde fan in sterke macht
mei hannen út ’e mouwen?
Hat muonts Beda wol beskreaun
’t bestean fan de gewoane man
mei hannen út ’e mouwen
of sloech hy foaral op sterken acht?
Op harren koe men bouwe.
Jarrow lit itselde sjen:
de iuwen troch hat dizze man
foar frou en berntsjes bodde;
kaam lykwols de krisis oan de macht,
feroare hy yn fodde.
Hoefier ha de bodders rûn
fan Jarrow nei de grutte stêd
om dêr te protestearjen?
Londen sloech op har probleem gjin acht,
de aksje moast mislearje.
Foto ‘Romeinsk fort yn Jarrow’
Foto ‘Skipsbou yn Jarrow’
december 17, 2022
fan ûnbekend*
Jeremia
Chananja kaam as nep-profeet
mei eigen wurden yn de timpel:
‘Harkje nei de wurden fan de Hear,
Dy’t binnen twa jier Babels jok
yn stikken slacht, de ballingen
werombringt nei Jeruzalem
en ek it timpelguod… de ommekear!’
It wurd fan Jeremia klonk:
‘Al wat jo hjir no profetearje,
guod en balling komme gau werom,
soe liede ta it grutste lok;
as útkomt wat jo preke ha,
dan hat de Hear dit boadskip jûn
en keart foar dizze stêd de tastân om.’
Doe naam de nep-profeet it jok
op slach fan Jeremia’s nekke,
sloech it stikken, naam opnij it wurd:
‘Sa wurdt it jok fan Babel slein
yn stikken ta ús eigen lok.’
It wurd fan Jeremia klonk:
‘It houten jok wurdt ien fan izer,
swier leit Babel dit de folken op
en do, Chananja, wurdst ek slein,
komst nea wer op it eigen honk.’
Yllustraasje ‘Jeremia en it jok’