december 22, 2022
fan Alfred Sisley*
De biskop koe wol seelju rêde,
want as Sint wie hy de man
dy’t macht hie oer de heechste weagen,
soms op see en faak yn it bestean,
hy hat de wrâld oer eage.
Syn namme stiet skier op ’e muorre,
komt noch boppe ’t wetter út,
dat funksjonearret as in spegel,
net de Sint, te skier yn it bestean,
trochbrutsen is de regel…
… dat Nicolaas it altyd rêde
kin om foar Sint troch te gean:
hy koe de wetterfloed net keare,
kaam sadwaande yn syn himd te stean
en kriich hjir net de eare.
* Alfred Sisley (1839-1899)
Skilderij ‘De oerstreaming, Port Marly’
december 21, 2022
fan ûnbekend*
Jeremia
As sprekker bin ik wol bekend,
mar no moat ik ek skriuwe
oan de ballingen yn Babel,
fuortfierd út Jeruzalem,
dy moatte dêr foarearst noch bliuwe.
‘Bou huzen, jou jim dêryn del,
lis hôven oan foar fruchten
om yn Babel fan te iten,
trou mei froulju foar jim bern,
sy hawwe neat yn ’t lân te duchten;
jim bern ha dêr in goed bestean
om sels yn tal te winnen,
bernsbern sille derfoar soargje
dat de stêd it goed ha sil,
dan skynt foar jimme ek de sinne.’
De Heare joech my noch dit troch:
‘It lot sil ienkear keare
foar de ballingen yn Babel;
reizgjend nei Jeruzalem,
jout elkenien oan My de eare.’
* Ikoan ‘Jeremia’