februari 4, 2023
fan ûnbekend*
Jeremia
It lân lei der ferlitten hinne,
sels gjin bist wie dêr te sjen,
lit stean fan dat dêr minsken wennen…
wie alles dan ferlern?
De stêd lei der ferrinnewearre
by, de strjitte sûnder bern
wie foar gjinien mear te werkennen…
wie alles dan ferlern?
Mar harkje wat de Hear te sizzen
hat nei alle kriichsgeweld
dat útrûn op in protte liken
fanwege ’t rjocht dat telt:
In bliid en fleurich lûd
fan brêgeman en breid,
fan tank oan God de Hear,
syn dieden binne goed.
It lot fan lân en stêd wurdt omkeard:
keppels binne wer te sjen
op ’t fjild en yn de stêd op strjitte
dêr boartsje wer de bern.
* Yllustraasje ‘Keppel skiep’
februari 3, 2023
fan ûnbekend*
Bysûnder útsicht op ’e hichten,
op ’e lichte ek, mei in rivier
dy’t op ’e Ryn útkomt;
wa’t hjir wenne ha, de iuwen troch,
kamen foar ’t kastiel yn ’t spier.
Boud waard der troch de iuwen hinne,
elke generaasje hie in styl
dy’t paste by de tiid;
wa’t hjir wenne ha, dy libje noch,
komme troch de bou yn byld.
Bysûnder útsicht op ’e skiednis,
net allinnich op ferskil yn bou,
mar ek op ’t warber folk;
wa’t hjir wenne ha, dy libje troch,
bliuwe oan har boustyl trou.
* Foto ‘Boarch Bürresheim yn Rynlân-Palts’