februari 12, 2023
fan ûnbekend*
fan Pablo Picasso**
Hoe woe de Dútske macht it ha
dy’t troch de loft mei faasje fleach
as oefening foar ’t kriichsgeweld
dat grif mei hasten komme soe,
mar earst nei Guernica!
Want Franco gie op ’t heechste ta:
ultime macht oer hiel it lân,
sadat gjin minskelibben telt,
mar inkeld wat mei faasje fljocht
op wei nei Guernica.
De bommen woene romte ha
foar Franco’s stribjen nei de macht
al waard in stêd dan ek ta hel,
wat fuortkaam út in oefening
op ’t proefplak Guernica.
Picasso woe op ’t djipste ta
mei ’t byld dat foar ’t ûntfanklik each
it lijen opropt fan wa’t telt:
de minske swalkjend sûnder skuld
troch ’t platte Guernica.
* Foto ‘Bombardearre Guernica’
** Pablo Picasso (1881-1973)
Skilderij ‘Guernica’
februari 11, 2023
fan ûnbekend*
Jeremia
Ik moat nei kening Sedekia ta
om út te sprekken wat der barre sil,
want Babels leger is al kommen,
foar de foarst wiist it net goed,
want nei de slach mist hy syn wil:
‘Jo wurde pakt en komme each yn each
te stean mei Babels foarst, as man tsjin man
sil hy de wierheid jo fertelle,
troch it swurd floeit der gjin bloed,
hy is wat oars mei jo fan plan.
Hoewol’t Jeruzalem yn fjoer en flam
opgiet, jo bliuwe wêr dan ek bestean
en sille dêr yn frede stjerre,
brâne sil foar jo it fjoer
fan leed, de rouklacht wurdt jo bean.’
* Yllustraasje ‘Sedekia’