februari 16, 2023
fan William Etty*
Skieden waard har libben troch de see,
mar koe dy harren leafde keare?
Hero wachte nachts Leander op,
dy’t har mei hert en siel fereare.
As de prysteresse fan it ljocht
hold sy de fakkel yn de hichte,
fielde troch de lea de herteklop,
dy’t sterker wie as al har plichten.
Swimmend hold hy nachts it ljocht yn ’t each
om streekrjocht nei har ta te kommen,
syn kondysje weage nei de top,
wylst rûnom him de brâning skomme.
Op in nacht stiek op in stoarm, dy’t him
syn krêft en har it ljocht ûntnommen
hat, doe stûke ek de herteklop,
sy sprong, is sa om ’t libben kommen.
Foar’t sy noch har lêste siken joech,
koe sy him krûpende berikke,
lei de fingers op syn kâlde hals
en preau it sâlt dat sy opslikke.
* William Etty (1887-1949)
Skilderij ‘Hero en Leander’
februari 15, 2023
fan ûnbekend*
Jeremia
Foarst Sedekia hie besletten
alle slaven moasten frij
nei seis jier trouwe tsjinst,
har wurk foar neat wie dan foarby.
Mar nei in koarte frijheid kaam de
omslach, wer de slavernij,
foargoed fergees yn tsjinst
of kaam it wurd fan God foarby?
Syn folk wie út Egypte helle,
dêrwei fierd nei ’t frije lân,
foargoed yn tsjinst fan God
of hold de trouwe tsjinst gjin stân?
Dit folk gie yn tsjin de belofte
fan de slaven bliuwe frij
nei seis jier trouwe tsjinst,
mar dochs begûn it op ’e nij.
Dêrom sil God har frij ferklearje
foar oarloch, honger, pest,
de dea nimt har yn tsjinst,
it frije libben hat dan west.
Yllustraasje ‘Slavernij’