maart 2, 2023
fan Gilbert Spencer*
Wat lit de hinnejonge sjen,
syn hinnen of de amer foer
of is it syn gesicht dat soer stiet…
giet de romantyk ferlern?
It hinnefolk hat amper kleur,
allinnich blibben binne read
lykas de kaam, de hinnejonge
giet syn gong, mar sûnder fleur.
De sek om ’t liif lit skilders sjen
lykas Picasso, sûnder doer,
noch gaadlik foar it hinnefretten,
ek foar him, net mear in bern.
Dus rinne hinnen mei him op,
al keakeljend en fierder neat
oars as se yn de groep wend binne
nei it fuorplak, sûnder rop.
* Gilbert Spencer (1892-1979)
Skilderij ‘Hinnejonge’
maart 1, 2023
fan ûnbekend*
Jeremia
De pommeranten woene witte
hoe’t it mei de rolle siet
en lieten Barûch komme:
‘Skriuwer, gean gau sitten,
lês ús foar, kom ta de died!’
It barde sa’t de hearen seine:
Barûch lies de rolle foar
sa’t Jeremia sprutsen
hie, de hearen heinden
wurden, net passend yn har spoar.
De pommeranten woene witte
hoe’t de rolle kaam ta stân
en wiene earst ferstomme;
Barûch mocht net sitten
bliuwe: ‘Stean net yn bestân!’
De hearen setten nei ’t paleis ta,
lieten witte: ‘It sit sa,
dy wurden ha ús stutsen!’
* Yllustraasje ‘Boekrolle’