maart 31, 2023
fan ûnbekend*
It jout in byld fan de natoer:
de mar by Essen mei de beammen,
mar it wie in part fan it gebiet
dêr’t trochrûn de fersmoarge Ruhr.
De Ruhr wie earst de libbensier
fan ’t Ruhrgebiet mei tal fan stêden,
dêr’t se songen it bekende liet:
‘Kom ekonomysk yn it spier.’
De skoarstiens stjitten stoffen út
dy’t stêd, rivier en grûn fersmoargen,
beammen rûsden doe it lijensliet:
‘De dea slacht ta by einbeslút.’
Mar sjoch hoe’t it feroare is:
de tûken bûge om te drinken
fan it wetter dat no sûnens biedt,
’t gebiet is fan syn takomst wis.
De beammen rûzje fan gelok,
want Essen waard de Griene Haadstêd
fan Europa, wat gjinien ûntgiet…
de blêden nimme noch in slok.
Foto ‘Badeneysee yn Essen’
maart 30, 2023
fan ûnbekend*
Jeremia
Jeremia seach de minsken
treurjen om it swiere lot,
se hiene keattings om de polzen,
moasten mei nei Babel ta…
wat waard syn eigen lot?
Jeremia seach de liifwacht-
kommandant, dy’t him de kar
liet tusken balling of frijman,
iepen lei it hiele lân
foar him, wat waard syn kar?
Jeremia hearde hastich
sizzen dat er rap werom
moast nei Gedalja as frijman,
dat hy makke sels gjin kar,
gie nei syn lân werom.
* Gevelskildering ‘Jeremia’
yn Alfeld, Dútslân