maart 10, 2023
fan ûnbekend*
Wa is de eigner fan Caprera,
in eilân yn de Middellânske See?
It binne folle mear as ien,
sy jouwe har gebiet te lien.
De geiten swalkje oer it eilân
en swermen fûgels fleane oer de see,
dêr tilt it fan de fisken op,
it bisteryk stiet oan de top.
It tilt net op fan de bewenners,
wol tille sy swier oan har bisteryk
en jouwe de toeristen rie:
‘Ferbliuw hjir sa’t it altyd wie.’
Wa’t eigners binne fan Caprera,
it eilân yn de Middellânske See?
It binne bisten, mannichfâld,
foar dit gebiet is ’t in behâld.
Foto ‘Caprera’ (Italië)
maart 9, 2023
fan Jacob Backer*
Dêr stiet se mei in spear en skyld,
de helm mei fearren op ’e plasse,
as goadinne fan de wiisheid,
dy’t net strykt mei oarlochsark,
falsk draacht sy út in suver byld.
Dêr stiet se yn it read-wyt-blau,
de kleuren fan de flagge, passend
by it heitelân, dat striidber
is as liuw mei ’t skerpe swurd,
falsk draacht sy út it byld fan frou.
Sy stiet foar elke presidint,
premier mei leechte yn de plasse,
passend by syn eigenwiisheid
om te striden foar de ear,
sy hâldt no ienkear fan sa’n fint.
* Jacob Backer (1608/1609-1651)
Skilderij ‘Allegory op de Republyk’