april 6, 2023
fan Adriaen Brouwer*
Men stikte doe net yn it stof
fan trekkers op it plattelân
en yn de hichte fleanmasines
dy’t it koalsoergas útstjitten,
boeren songen noch Gods lof.
Mar nei de lof gie ’t nei de kroech,
ûntspanning lei wol foar de hân
mei stof genôch om oer te praten,
drank om ryklik yn it nimmen,
kaarte wat wer spanning joech.
Ferrek om myn part, stik, fersûp
yn eigen miich, ik ha it hân
mei dy, falsk spylje, ek noch lige,
dêrom sil ’k dy stikke litte
yn it stof, op knibbels… krûp!
Sjoch, boargers, hoe’t it eartiids gie
mei boeren yn beweging, stân
hold doe gjin boer dy’t foar ûntspanning
gie de kroech yn, dêr útstjitten
waard en daliks bûten stie.
* Adriaen Brouwer (sirka 1605-1638)
Skilderij ‘Ynterieur mei fjochtsjende boeren’
april 5, 2023
fan ûnbekend*
Jeremia
Gedalja kriich fan elk de ear
dy’t achterbleau yn ’t heitelân,
as foarst regearre hy yn Mispa;
’t wie de kommandanten nei it sin,
mar Jochanan wist, ‘t hold gjin stân.
Dy kommandant hie in skerp ear,
dat heinde op in moardoanslach:
de kening fan de Ammoniten
hie oan Jisjmaël de opdracht jûn,
dêrfan die Jochanan ferslach.
Gedalja fûn soks wie net wier
en nûge Jisjmaël oan ’t miel
mei tsien man fan de Ammoniten;
Jisjmaël sloech doe Gedalja dea,
syn tsjinners krigen ek har diel.
* Foto ‘Festeldei nei oanlieding
fan de moard op Gedalja’