april 20, 2023
fan Rembrandt*
Wurdt in bline ea ûnstjerlik?
Lit it antwurd libje troch de tiid
mei wurden dy’t net stjerre kinne,
klinkend yn ’t antike liet.
Lit Homerus mar fertelle
mei it each op spanning yn ’t ferhaal,
de skriuwer soarget mei de pinne
dat it komt yn kleare taal…
… op papier, de Ilias en
Odyssee, ferhalen ek oer striid,
dêrnêst foar yn ’t bestean te winnen
wiisheid, klinkend yn in liet.
Wurdt in bline ea ûnstjerlik?
’t Antwurd komt fan Aristoteles:
‘In bline lit syn tinzen rinne,
jout oan filosofen les.’
* Rembrandt (1606-1669)
Skilderij ‘Homerus diktearret syn fersen’
Skilderij ‘Aristoteles mei de búste fan Homerus’
april 19, 2023
fan ûnbekend*
Jeremia
Gean net nei Egypte ta,
dat hie it wurd west fan de Heare,
want dan komme jimme grif yn ’t nau,
dat wurd hie Jeremia oerbrocht,
mar koe dat it folk wol keare?
Jochanan woe ’t sa net ha,
dat Jeremia soe it lige,
Babelsk kening brocht it folk yn ’t nau:
fermoardzje of nei Babel bringe,
dus foldie Egypte tige.
Wat it folk woe, barde sa:
it wie op reis in lange staasje,
nimmen rekke ûnderweis yn ’t nau,
mar Jeremia waard wol twongen
om te reizgjen mei de naasje.
* Yllustraasje ‘Juda op reis nei Egypte’