april 25, 2023
fan Abraham van den Tempel*
Hjir stean ik dan mei fjouwer hûnen,
ja, ik nim se mei op jacht
om achter hazzen oan te jeien,
nee, ik nim mysels yn acht,
dus bliuw ik stean wêr’t ik no bin.
Ik bin fan heech komôf, dat sizze
se, in oerwûn keningsbern,
dat bûtendoar de septer swaaie
mei, dat is my oan te sjen
mei stôk en sjerp, sa’t ik hjir stean.
Rûnom stean ik bekend, yn Hollân
wie myn heit al kening ôf
nei’t hy yn Ingelân de septer
swaaie koe, trou oan syn frou,
yn Hollân net, syn soan bin ik.
In fearnsiuw letter siet James finzen
yn de Tower, mei de dea
foar eagen, sûnder trouwe hûnen,
doe op jacht yn Hollâns gea,
mar jierren letter wie er bút.
* Abraham van den Tempel (sirka 1622-1672)
Skilderij ‘Portret fan in jonge fan adel (James Scott)
april 24, 2023
It spoarde net mear op ’e rails,
sadat gjin reizger arrivearre
troch ynflaasje foar it folk
dat nei de heechste bonus socht,
it waard te leech wurdearre.
Lûk út it grint de beide rails,
sadat de treinen net mear ride
kinne, ’t oerlis is ûntspoard,
wat prorail rap yn aksje brocht,
wa’t foar is, lit dy stride.
Men lûkt troch it bestean in spoar,
dat meastal ôfwykt fan streekrjochte
banen, passend by it folk
dat foar it rjocht op takomst striidt,
dêr’t foarfaars ek foar fochten.