juli 22, 2023
fan ûnbekend*
Ezechiël
In beam is Israel
yn folle bloei fan ûnrjocht,
ek folop yn ’t blêd fan oermoed,
goddeleazens sjit op nei syn krún,
dy beam komt kreakjend del.
De keaper hat gjin goed
gefoel, gjin wearde hat syn
guod, ferkeapers jild krijt ek gjin
doel, want alles giet ferlern,
de ein rint út op bloed.
De ein fan Israel
komt troch syn dwaan en litten,
syn oermoedige praktiken,
’t rjocht komt del en wurdt ta pún,
God is net mear yn tel.
God makket dan in ein
oan alle goddeleazens,
rampen komme oer de minsken,
útkomst is net mear te sjen,
dêrmei is alles sein.
* Foto ‘Deade beam’
juli 21, 2023
fan ûnbekend*
Bylden út in fier ferline
rize út ’e grûn wei op
yn ’t keale gea fan Arizona,
dêr’t gjinien te finen is,
wol spilet wittenskip foar wis.
Bylden kinne ’t lot fertelle
fan it oerwâld dat dêr wie,
de beammen waarden tsjok bedobbe
troch de jiske fan it fjoer
dat lôge ’t hiele lânskip oer.
Hout feroare yn kristallen,
dat in stam waard sa in byld
dat útstiek boppe ’t flakke lânskip,
sa ûntstie in iepenloft-
museum foar in duorjend skoft.
* Foto ‘Jasper Forest yn Arizona’