augustus 13, 2023
fan ûnbekend*
fan ûnbekend**
Hy hie in brede ynteresse,
’t gie fan planten, fûgels nei muzyk,
hie yn ’t minskdom wol fidúsje,
wie foar frede yn de wrâld…
mar hoe siet it mei syn yntuysje?
Mei seis jier koe hy net beseffe
dat syn mem him nea wer helpe soe:
wat wie wierheid, wat yllúzje?
Dat ferskil wie al hiel âld…
hie hy urven mem har yntuysje?
Hy naam de politike treppen,
fan gemeenteriedslid nei premier,
wie foar frede, hoewol rûzje
kaam al neier yn de wrâld…
koe hy driuwe op syn yntuysje?
Hy hie in brede ynteresse,
mar fersinde him yn ’t Dútske ryk,
hie yn Hitler wol fidúsje:
‘Peace yn our time’, mar sâlt
smarde Adolf op syn yntuysje.
* Foto ‘Neville Chamberlain’
** Foto ‘Chamberlain en Hitler’
augustus 11, 2023
fan ûnbekend*
Wol trije muorren om ’t kastiel,
massyf de stiennen tuorren,
dy’t it holden tsjin geweld,
gjin ridder koe it rêde
om yn te nimmen fort en siel.
De leafde spile ek in rol:
Bianca Pellegrini
wie maîtresse fan har hear;
in Pier Maria Rossi
hold it oant de dea ta fol.
De fresko’s, oan har leafde wijd,
fertelle net fan tuorren
dy’t it holden tsjin geweld,
mar byldzje út yn kleuren
wêr’t de fijân poer oer swijd.
* Foto ‘Kastiel Torrechiara yn Italië’