It soe der net om spanne,
want Ljouwert wie al kampioen
mei oan it helmhout Turbo Ulbe*,
net oan  lot en pommeranten bûn,
hy hie it roer yn hannen.

Mei ’t earste plak foar eagen
seach hy de Snitser weagen oer:
ien foar en tolve skûtsjes achter;
’t liuwke lei It Fean op ’t roer
en hat de sprong doe weage.

Mei ’t helmhout los yn hannen
siet Ulbe laitsjend oan it roer
mei achter him de konkurrinten;
as men Turbo hjit, dan is ’t gjin toer
as skipper te ûntspannen.

* Ulbe Zwaga

Se wiene beide net yn byld:
de liuw en likemin Emanuel*,
dochs hiene se wol syld
en nei de finish punten teld.

Op Ljouwert wisten se it net,
’t gie min, se sylden yn de middenmoat,
de foarein wie beset,
de twivel sloep by har oan board.

Gjin konkurrint foer yn de kop,
sadat de liuw bleau net oan twivel bûn,
de flagge koe yn top,
want Ljouwert wie al kampioen.

It wie foar ’t earst dit skûtsjejier
dat Earnewâld foer wis en fier derút,
’t jûchhei foel net sa swier,
noch lichter fielde doe de tút.

* Namme fan it Earnewâldster skûtsje