september 15, 2023
fan ûnbekend*
fan ûnbekend**
Lit ús de chinooksalm ris folgje
yn de paaitiid nei it berteplak,
begjinnend yn de Stille Oseaan,
by de stêd Vancouver lâns,
de Fraser River jout de kâns.
It giet fan leech nei hieltyd heger
tsjin de stream yn nei it berteplak
om ’t libben oan wat folget troch te jaan,
by de wetterfallen op,
fan binnen klinkt de bernerop.
’t Is mear as tûzen kilometer
swimmen nei it efterhoedeplak
om dêr foar it ferfolch de plicht te dwaan;
wat de chinooksalm ús sjen
lit, is trochsette foar de bern.
* Foto ‘Chinooksalm’
** Foto ‘Fraser River yn Rearguard Falls
Provincial Park yn Kanana’
september 14, 2023
fan Frans van Mieris*
It gie net fierder sûnder snijen,
nettsjinsteande dat hy fierder seach
as ’t boek dat him yn de besnijing hie,
yn skrift in spegel fan ’t hielal,
dêr hie it mei te krijen.
Hy kriich al ier each foar de ierde,
dy’t syn draai fûn yn it universum,
foar wittenskippers al in iepen boek
mei eigen ierde as planeet,
mar fierder moast men riede.
As wittenskipper woe hy fierder,
fan de iene nei de oare stjer,
wol wittend mei in brein dat flymjend skerp
bleau, want oars kaam syn ear yn need,
hy wurke as in siedder…
… dy’t wurden struide oer de ierde
foar kollega’s yn de wittenskip,
mar fierder moast hy mei syn each en brein
skerp bliuwe, ek syn guozzefear
op tiid it mes oanbiede.
* Frans van Mieris (1635-1681)
Skilderij ‘Alde man dy’t syn pinne snijt’