september 23, 2023
fan ûnbekend*
Ezechiël
Guon âldsten kamen by my,
mar foar’t sy sprekke koene,
hearde ik it wurd fan God:
‘Sy tsjinje smoarge goaden,
stroffelje oer ûngerjochtichheid,
do bist foar My de boade,
dus sprek as minskesoan har ta
mei ’t antwurd dat by harren past
as tsjinners fan de smoarge goaden,
stroffeljend oer ûngerjochtichheid,
hoe is it mooglik dat sy doarden
dy te freegjen om in wurd fan My!
Dus sis as minskesoan tsjin har,
sy wurde foar it folk ta spot,
dat him bekeard hat fan de wei
dy’t streekrjocht fierde nei de goaden,
wylst it stroffele oer ûngerjochtichheid;
de âldsten lykwols wurde weisnoeid
út Israel, tenei in skjinne oarde
foar myn folk, Ik bin har God!’
* Yllustraasje ‘Ezechiël’
september 22, 2023
fan ûnbekend*
Kom nei de delling fan it fjoer
om deis de hjitte te fernimmen
dy’t op ’e reade rotsen brânt,
lûk nachts de sliepsek oer de krún
om waarm te bliuwen yn de kjeld,
mar net as men de stjerren telt.
Sjoch hoe’t de makker fan de koer
syn teken yn de sânstien kerve
hat, al twa milennia
ferlyn, syn ynspiraasje wie
de himel dy’t him joech it ljocht
fan sinne, moanne, stjerrenocht…
… sa’t ek de minske hjoed de dei
nocht oan it fallen fan de stjerren
hat; in stien, dy’t efkes brânt
en dêrnei yn de kleare nacht
ferstjert, bliuwt libben troch syn pracht.
* Foto ‘Valley of Fire State Park yn Nevada’