oktober 9, 2023
Op harren kaam de kym griis oer,
it lot trof elk, stokâld of jong,
twa stiene noch op poaten,
ien hie de ein al yn de bek…
blautong.
De wittenskip kaam sniewyt oer:
de wite reagers yn totaal
sa’n fyftich, heech op poaten,
foar oerlis oer ’t faksin, mar dat
ferhaal…
… kaam net sa maklik oan de ein
mei hjir in kikkert, dêr in mûs,
twa fan wol hûndert soarten,
’t bleau net by trije… deaden by
de rûs.
oktober 8, 2023
fan ûnbekend*
Hoe lang hat sy noch libbe
yn de mûning fan de Theems,
wyld meifierd troch de streaming,
koers hâldend nei de see…
sy hie nei heger stribbe.
Op wjukken nei de hichte
wie har earste wylde winsk,
in fiere flecht, in oare,
as frou ek in primeur…
sy fielde har ferplichte…
… ta earst emansipaasje:
fleane nei Australië
as frou alhiel allinne
en letter yn de striid
foar Ingelân, har naasje.
Op wjukken nei de hichte
foar de winst foar ’t heitelân,
seach Amy Johnson ûnder
har ’t weagjen fan de Theems…
sy crashte yn de lichte.
* Foto ‘Amy Johnson en har fleanmasine’