december 8, 2023
fan ûnbekend*
De bearen wiene net te sjen
troch alle beammen oan wjerskanten
fan de brede Hudson-stream,
dy’t harren tsjinhold om elkoar
te moetsjen, wat wie lang in dream.
De minske as in beare-freon
sloech om him hinne beide earmen
yn in leafdefolle dream,
hy hie it samar foarelkoar:
in brêge oer de brede stream.
De dream hong earst noch yn de loft:
hoe koe de stream oerbrêge wurde
sûnder dat er midstwa briek?
Mei hingjen kaam it foarelkoar
hoe heech er boppe ’t wiet ek stiek.
De bearen wiene wol te sjen
doe’t sy massaal de stream oerstieken
sûnder dat de brêge briek.
* Foto ‘Bear Mountain Brêge
oer rivier de Hudson’
december 7, 2023
fan Francisco de Goya*
Gjin riem koe hy hjoed fine,
dat it slagge him net mear
om syn broek goed op te hâlden,
mei syn hannen kaam it ek net klear.
Gjin doekjes koe hy wine
om de hannen en de kop,
boppedat wie hy ferkâlden,
as in snotnoas seach er by elk op.
It boarst joech him ek pine,
want it hert wie faak fan slach,
dat wie net om fol te hâlden…
bliuw de hiele dei troch dan mar wach.
Hy woe him net mear bine
oan de sitting fan syn stoel,
wêrom soe hy dy noch hâlde?
Sa’t er hjir noch libbe, hie gjin doel.
Foar him wie hjoed ferline,
dat syn takomst hold net oer,
alles bleau dochs by it âlde,
dat er opgean liet yn lôgjend fjoer.
* Francisco de Goya (1746-1828)
Yllustraasje ‘Hy stekt syn hûs yn de brân’
Print 18 út ’e searje ‘Los Caprichos’