januari 5, 2024
fan ûnbekend*
Wannear’t in beek wurdt ta in stream,
dy’t kolket troch ravinen,
is der foar it folk gjin hâlden oan
om oan de oare kant te kommen,
inkeld yn in dream.
Wa’t dreamd hat oer de woartelbeam,
kin wol in oergong fine
om mei drûge fuotten oer ’t ravyn
te kommen: bûch de sterke woartels,
rin dan oer de stream.
Yn Meghalaya falt de rein
mei bakken út ’e himel,
gjin gebiet is wieter as dat gea,
mar troch de woartels fan banyan
wurdt in brêge slein.
* Foto ‘Ritymmen woartelbrêge
yn Meghalaya, Yndia’
januari 4, 2024
fan Tobias Baanders*
Kening Winter op ’e lêste dei
fan de lêste moanne fan it jier
hat fan ’e moarn twa bearzen fongen
op ’e Sânemar by Earnewâld,
hy naam se foar prins Ulekrite mei.
Mar prins Ulekrite kriet op slach
dat de fangst wie hjoed der fier by troch,
want ein desimber moast it sjonge
fan de redens op ’e Sânemar,
op iisnocht wiene alve stêden wach.
Kening Winter fûn dat flauwe kul,
hy hie neat mear mei in kâld klimaat,
want kjeld sloech him fûl op ’e longen,
mar prins Ulekrite liet gjin kar:
in tou bûn hy heit-kening om de mul.
Slepend fierde hy foarst Winter mei
oer de waarme grins fan âld nei nij,
dêr’t hy de âlde tiid ferjonge,
lok en seine makken ’t gea iiskâld,
sadat de wiisheid ried nei nijjiersdei.
* Tobias Baanders (1946-…)
Skilderij fan 2009