Oarloch swypket herten op
en lit it bloed troch helde-ieren jeie
foar de striid, lûd klinkt de rauwe rop:
‘Us naasje sil fiktoarje kraaie!’

Legers stampe oer de wei
nei frijheid, want dy wol it folk moarn priuwe,
foar Amearika in nije dei:
‘Jou acht en fjochtsje hjoed as liuwen!’

Sjoch de dea fan generaal
Montgomery yn ’t hjitst fan ’t rekke sjitten,
mar gjin noed, it lân tinkt nasjonaal:
‘It monumint sil ’t witte litte!’

Op it netflues brânt it byld
fan eigen hûs en folk yn ljochte lôge,
op ‘e hûd ha se it skroeien field,
yn ’t libben byld en plak meitôge.

* John Trumbull (1756-1843)
hat in searje skilderijen makke
oer de Unôfhinklikheidsoarloch
fan Amearika.
Skilderij ‘De dea fan Montgomery’

* Marc Chagall (1887-1985)
skildere de ferskrikkings
fan de oarloch yn (Wyt-)Ruslân.

Hy spile foar ferlerne soan
dy’t yn de kroech in faam bestriek
en dronk op noch mear wille,
want der wie neat wat him briek,
hy fierde ’t libben oant de moarn.

Hy dronk op ’t slagjen fan ’t tafriel
mei Saskia, syn leave frou
en soe har heger tille
as in kroechfaam yn de kou,
sa wiene sy dan ien fan siel.

De lichems binne lang al wei,
mar yn de himel ha se diel
oan allerhande tinten
dy’t har minge ta ’t tafriel
fan wille op dy iene dei.

God liet him ek wat oars noch sjen:
de felle kleuren fan ’t portret
dat maat Picasso makke;
sa’n tafriel dat doogde net,
hy fielde him as soan ferlern.

* Rembrandt (1606-1669)
Skilderij ‘Selsportret mei Saskia’
(De ferlerne soan yn de kroech)

* Pablo Picasso (1881-1973)
Skilderij ‘Rembrandt en Saskia’