’t Wie waarm, de see loek oan
as ’t libben sels mei eb en floed,
as mem koe sy dat fiele,
dreame oer de takomst fan har soan,
sa koe se ’t mei him diele.

Se seach him efkes oan,
nee, seeman siet him net yn ’t bloed,
as mem koe sy dat fiele.

Sa siet se op it strân
te harkjen nei syn brabbellûd
as wiene it gedichten:
’t djipste fielen oer de see, op ’t lân
klom hy nei grutte hichten.

Se seach him efkes oan,
in ezel wie foar him wol goed,
mar Jezus waard ferplichte…

Sa siet se mei har soan
by see mei ivich eb en floed,
as mem koe sy it hearre
hoe’t it rûze op deselde toan
fan berte oant it stjerren.

Se seach him efkes oan,
in harlekyn op ’t hynder, hjoed
en moarn mei fleur tegearre.

* Pablo Picasso (1881-1973)
 

Se kamen op ‘e hichte
fan de adel, boargers heech fan stân,
en giene op ‘e hazzejacht
mei ’t fjurrich wapen troch it lân,
’t wie ien fan har morele plichten.

En is de hazze sketten,
dan begjint de show, elk slacht him acht:
‘It is lykas iksels in fette!’

Sy sieten yn de lichte
fan ’t bestean te kaarten op it hout
en wiene op ‘e duitejacht
mei ’t sljochte wapen fan elk klaut,
want: ‘Deale, wy ha ek ús plichten!’

En hat de ien ’t mei ligen
wûn, dan slacht er op it blaasplak acht:
‘Ik moat earst skite… of is ’t mige…’

* Gonzales Coques (1618-1684)
spesjalisearre him yn lytsskalige
groepsportretten fan rike boargers.

** Adriaen Brouwer (1606/1607- 1638)
skildere foaral tafrielen mei boeren
en oare plattelânbewenners.