Hoewol’t de greide is syn plak,
hat hy foar ’t sicht de hichte socht
foar gaadlik ûnderdak,
lykas in stedsappartemint,
omdat er minder maklik fljocht,
it leafst op ’t suden in balkon,
want hy is oan de sinne wend…
mar is de flier fan hurd beton?

Sy sit al dagen ûnderdak
op tûkjes yn de delte socht,
der is gjin better plak
foar ’t jonge memke yn de kream,
in kwestje dat it maklik fljocht
foar bern fan dizze hichte ôf,
’t appartemint as yn in dream,
beton bringt har net yn it nau.

De flagge hinget alle dagen út,
mar ’t is net inkeld foar de sier,
de frou wol graach de man befrije
fan tefolle hier.

In swiere motor glânzet achter ’t rút,
it manljuseach kin dêr wol oer
en mei de frouljusglimk ek lije…
op moderne toer.

Hjoed hinget op ‘e toer de flagge út
foar ien dei yn dat iene jier
doe’t sy fan fierren Snits befrijden
fan wat weage swier.

Moarn sjocht de man wer nei de motor út,
de helm komt op it koarte hier,
op folle toeren tusken greiden
rydt er withoefier.