De ieuwen troch is ’t yn de hichte gien
mei tsjerke, katedraal, abdij,
se wiene dêryn ien en mien,
it heil fan Wurd en koar bleau nij.

De swarte froulju mei de wite kap
beskôgje ’t heil no fan it plein,
elk hat in miening, stap foar stap
sil ’t hjoed wer nei de kreamkewein.

De wein rydt jûn wer fuort, it plein wurdt leech,
sa giet it yn it wrâldsk bestel,
lykwols de katedraal bliuwt heech,
it heil jout him perfoarst net del.

De ieuwen taaste ek de muorren oan
fan tsjerke, katedraal, abdij,
it Wurd is op dat plak ferstoarn,
it koar leit der earmoedich by.

De hoeder hat de keppel binnenbrocht,
syn hûn jout him hjoed noflik del,
de skilder boartet mei it ljocht,
sa is de tsjerke noch yn tel.

* F. Boulanger (1819-1873)
wie in Belgyske skilder fan stedsgesichten.

** Jean-Baptiste De Jonghe (1785-1844)
wie in Belgyske lânskipsskilder.

De hoeven dreune op ‘e hurde grûn,
want drave sil de hynstekloft
de hiele baan yn ’t rûn,
sa út en troch de poaten yn de loft.

De stive leie hat har yn de macht,
want dêr is gjin ûntkommen oan,
in hoart foar jou no acht,
de eigner sit as foarst heech op ‘e troan.

Hjoed is it hynder inkeld hannelswaar
en showt syn krêften foar it jild,
wurdt letter pas gewaar
dat hy de lêsten fan dy oare tilt.

Mar hy is eigen baas, it stiet him frij
te draven of hjir stil te stean
as foarst fan de fallei,
de hichte hat him hûndert troanen bean.

* Rosa Bonheur (1822-1899)
makke it skilderij ‘De hynstemerk’
(245 x507 sm.)
nei oardeljier stúdzje.

** Edwin Landseer (1802-1873)
wie yn syn tiid de bêste diereskilder.
Skilderij ‘Foarst fan de fallei’