Se roppe en se raze
mei programma’s rjochts en links
fan liuwesturt oant glêd gesicht,
se ha it measte fan in sfinks,
ús politike bazen.

Hy rôp net nei de lichte
mei programma’s nei it folk,
mar knibbele… wat is myn plicht?
Sa waard er foar de goaden tolk,
it folk kaam op ‘e hichte.

Syn deemoed makke mylder,
mar hy stelde wol de wet,
de kodeks as in heech gedicht
foar ieuwen yn de rûnte set,
hy troane op dy pylder.

* Stânbyld fan de biddende Hammurabi
** Kodeks Hammurabi, kening fan Babylon

’t Swart-wite hat har yn besnijing,
faakris swalket sy fan hjir nei dêr,
is soms de sinne, dan wer stjer,
sa siket sy om har befrijing.

De jûntiid skynt foar har it gânse
libben, sakjend yn de djipte wei,
gjin langstme nei in nije dei
of dochs fanwege ljochte kânsen.

Want by har delgean lit se klimme
har gefoelens foar de heechste stjer,
de ein fan ’t swalkjend hin en wer,
tenei sil sy it derfan nimme.

Sy naam it stel mei út ‘e sinne
wei en brocht de geiten yn it skaad,
it swalkjen leit har yn it aard,
se is yn ’t fjild gjin tel allinne.

* Jozef Israëls (1824-1911)
rekke ûnder ynfloed fan de Dútske Romantyk
en wie letter de nestor fan de Haachske Skoalle.
Skilderij ‘Mimerje’

* Gerard Bilders (1838-1865)
lit yn syn wurk de oergong sjen
fan de Romantyk nei it Realisme.
Skilderij ‘De geitehoedster’