Sa wolkom wêze kin in bern,
al is it dan op ’t rûge strie
en ûnder ’t byntwurk fan in stâl,
it is oandwaanlik om te sjen,
elk is mei dit mystearje mâl.

De mem en heit stean yn it ljocht
dat strielet fan dit wûnder ôf
en bynt de minsken oaninoar;
de hoeders ha dit skynsel socht
en steane der yn deemoed foar.

It felle ljocht leit achter har,
de houten wente brânt as strie
omdat sy in Joadinne is,
de pogrom wie foar ’t bern te bar:
de skreau, fan ’t libben net mear wis.

* Rembrandt (1606-1669)
Skilderij ‘De oanbidding fan de hoeders’

Se kamen hastich by elkoar,
ien is noch jong, de rest is âld,
de hege hearen fan de wize les,
se witte allegear wêrfoar
en dêrom ek dit needkongres,
want moarn fergiet de wrâld.De dames hawwe ek ferlet
om mei te praten oer de ramp,
se binne allegear net oan de miet
en ha har sin op ’t libben set,
it mier oan opgean yn in damp
as moarn de wrâld fergiet.

De hearen yn in drok petear,
gjinien sjocht dêr de dames stean,
om’t elk bebiten is yn eigen sâlt,
se reitsje mei harsels net klear,
dus gean de froulju út ‘e klean,
want moarn fergiet de wrâld.

Rampsillich dat fan har in pear
mar each en ear ha foar wat hâldt
de bleate froulju by de wize les,
se komme foar de ramp net klear
op harren hegeneedkongres,
ja, sa fergiet de wrâld.

* Paul Delvaux (1897-1994)
wie in Belgyske skilder,
dy’t nei in ekspresjonistyske perioade
oergie op ‘e surrealistyske styl.