Men sil deselde hobby ha,
each foar detail en op it doek,
’t giet wol op fariaasje ta,
de ien it skiep, de oar de snoek.

Hy sit te kueren nei it fee
dat leit te slomjen op it gers,
it iennichst selskip op dit stee,
it hâldt him wekker, by de les.

Fan ’t wetter waaie lûden oan,
in heech jûchhei, mar wêrfoar dat?
Syn hobby is foar hjoed bedoarn,
it fee lûkt fan it gers it gat.

Gjin snoek sit oan de hoek, in foarn,
’t posearjen duorret hjir mar koart,
de sketser lûkt de streken skoan
ta foarn, mar inkeld yn it swart.

Men sil deselde hobby ha,
de ien set mei mislearre fee
op hûs en atelier wer ta,
de oar is mei ien haal al ree.

* Hendrikus van de Sande Bakhuyzen (1795-1860)
Skilderij ‘Selsportret yn in lânskip’

** Huib van Hove (1814-1864)
Skilderij ‘In fiskpartij’

… mei op ‘e fjilden skot op skot,
fataal foar hazze en fazant,
yn ’t hingjen neffens jagerstrant,
mar oars as ’t lot…

… fan ’t fûgeltsje yn bang gefjocht
bestrûpt, úteinlik hingjend dea:
in hjerstblêd dat al skaait nei rea
yn simmerljocht.