Joed, de earste letter fan Jahweh,
de hân rjocht út ‘e hichte wei
om nei de ierde út te stekken;
twa hannen nimme tsien kear mei
in fingerwizing foar it libbenspaad.

Noch twa letters binne fan Jahweh:
hee, ’t finster op ‘e ivichheid
om mei it each omheech te rikken;
en wav dy’t de ferbining leit,
in minskehân omheech, de fingers spraat.

Komme sa de hannen byinoar,
dan ljochtet yn it blau it wyt
om yn jûchhei lûd út te brekken;
de ierde sûnder wryt of slyt
komt sa as ’t hôf fan Eden op ‘e kaart.

Sjoch ek: Religy
Alef, Beet, Gimel, Dalet, Hee, Wav, Zaijn, Chet,
Tet

Slang dy’t linich yn de rûnte draait,
de foarm fan sifer njoggen,
is ’t net tov hoe’t hiel de skepping rint,
oan bernelibben wint
sa’t wy it alle dagen sjogge?

Frucht dy’t feilich yn de skurte leit,
de foarm fan sifer njoggen,
mem sa tusken fjoer en wetter yn,
har geast waait as de wyn
dat sy elkoar gjin kwea mear dogge.

Sara, Rachel en dan Hanna noch
ha wachte, mar gjin njoggen
moannen freugde waard earstoan har diel;
mei bern is ’t libben hiel
sa’t wy it alle dagen sjogge.

Slang dy’t linich yn de rûnte draait,
noch altyd sifer njoggen,
en net ta de kweade frucht ferliedt,
mar ’t bern beskerming biedt
sa’t troch de ieuwen memmen dogge.

Sjoch ek: Religy
Alef, Beet, Gimel, Dalet, Hee, Wav, Zaijn, Chet