december 26, 2016
It hat wer west, de dagen fleagen
fan moarns ier oant yn de nacht
en ik seach nei de loft
as stie ik koart op wacht
mei oars net as har komst foar eagen.
Op earste krystdei wie it rekke,
oars as ik ferwachte hie:
in brutsen ingelwjuk,
fertize yn de trie,
ik wist… se koene net ûntbrekke.
Op twadde krystdei hat it striele,
tûken heinden op it ljocht
fan ingels ûnderweis:
se hiene ’t boadskip brocht,
dy iene wjuk wie grif wer hiele.
Ynienen stie ik as ferstive:
tûzen ingels yn it swart
dy’t krasten har berjocht:
‘It is noch lang net bard,
de nacht komt noch, it fljocht tsjin fiven.’
december 25, 2016
fan ûnbekend*
fan ûnbekend**
Kaam ynspiraasje fan it bier
dat Willem Hovy broude?
Hy wie ien fan de universiteit,
de frije, dy’t se bouden.
Ek Kuyper kaam dêrfoar yn ’t spier
mei Abraham as namme,
dy’t tsjûge fan in ropping, âlde heit
fan hûndert, net beskamme.
De Frije Universiteit
waard mei in opdracht stichte:
it ljocht fan Kristus skynt troch elk domein
en fiert sa nei de hichte.
Dy grûnslach wie in ieu in feit,
mar sekularisaasje
hat Abraham syn roppingswei ferlein
nei ’t roppen om mear faasje.
* Logo VU
** Boarstbyld ‘Abraham Kuyper’