januari 8, 2017
fan ûnbekend*
fan ûnbekend**
Wa’t net tefreden is, sil kleie
oer hoe’t it om en ta giet,
yn Nederlân is dat wizânsje;
songen wurdt in earnstich liet,
de tsjerke fiert de Doleânsje.
Sjedêr it godsfolk, yn betsjoening
fan hoe’t it om en ta giet
by ’t nachtmiel fan de Doleânsje,
folge troch in earnstich liet,
sa wurdt dit foar it folk wizânsje.
De âlde tsjerke liet ferwaaie
wat hearde by de rjochte lear,
de Geast soe ’t fromme folk wol liede
nei in tsjinst mear God ta ear,
sa binne tsjerkewegen skieden.
It âlde liet wurdt net mear songen…
wa is oertsjûge fan de lear
en kin in oar dy krekt fertelle?
Kleiend oer de ommekear,
hat net it nijs op Facebook helle.
* Yllustraasje ‘Nachtmiel’
** Foto ‘De Doleantie’
januari 7, 2017
fan ûnbekend*
Fiif soannen hie Mattatias:
Jehannes, ek wol Gaddy neamd,
Simon mei de namme Tassis,
Judas Makkabeeër,
Eléazar neamden se ek Avaran
en Jonatan dy’t ek wol Affus hiet.
Fiif soannen kamen yn ferset
tsjin ’t goare heidendom,
sy holden har oan Mozes’ wet,
behellen foar de Joaden rom.
De fijân brocht de soannen om,
earst fjouwer yn de striid,
wat rjocht wie, bûgde dêrmei krom,
allinnich Simon kriich noch tiid.
Hy boude earst in monumint
foar heit en mem en broers,
sa bleauwen deaden noch bekend,
foar Simon wie it rjocht de koers.
Ferried sloech ta, hy rekke dea
as lêste fan it skaai,
de tiding rûn troch hiel it gea:
de Makkabeeërs binne wei.
* Ofbylding ‘Simon de Makkabeeër’