januari 12, 2017
Hy stie as boade by de doar
mei rjochte rêch yn steatlik pak
wannear’t de tsjerkeklok wer liede moast,
it doarp joech oan, dat wie syn plak,
mar wie hy dêr net boade foar?
It wenplak oan de Grienedyk
joech yn de simmer klear de kleur
nei’t earst it bermkrûd helder ljochte hie,
dêr hearsken rêst en folop fleur,
in plak oan ’t paradys gelyk.
Hy fytste by de minsken lâns
mei ’t boadskip fan syn slimme kwaal,
’t berjocht dat hy dy simmer krigen hie,
manmoedich die hy syn ferhaal,
trochlibje hie foar him gjin kâns.
Sy stiene om har man en heit
mei soarch, want trochgean woe it moed
dat iepenstie foar leafde mei de hoop:
de dei fan hjoed wurdt foar him goed…
hoewol’t de dea gjin ein foarseit.
Wer stiet in boade by de doar,
in oare, want syn wurk is dien,
de winter streket feart en finne griis,
syn libben kleure ’t lânskip grien…
wie hy dêr ek net boade foar?
januari 11, 2017
fan ûnbekend*
Jehannes, soan fan Simon
Makkabeeër, man fan bea en striid,
de hegepryster en de generaal…
wa is bekend mei syn ferhaal?
Hy libbe yn in tuskentiid.
De timpel wie syn wurkplak,
op ’e muorrebou seach hy ek ta,
gjin fijân krong troch yn Jeruzalem…
mar wa wit fierder wat fan him?
Hy libbe op syn eintiid ta.
Pompéjus wie yn opkomst
mei ’t Romeinske leger, generaal
dy’t briek de muorren fan Jeruzalem…
de hegepryster hie gjin stim,
mar Betlehem spriek nije taal.
* Byld ‘Pompéjus’