maart 20, 2017
Lit him mar op it spul takomme,
want hy hat it yn de macht
om mei de frachtwein fuort te riden,
nee, hy hat noch net folslein de fracht,
riedt him wol ta op oare tiden.
Dan is de wrâld foar him ferromme,
rydt er laden oer de grins
en sjocht himsels en beammen bloeien…
wie de fierte net folslein syn winsk?
Wol mei it each op fierder groeie.
Is oan de ein de hûd ferklomme
nei it lossen fan de fracht,
de bannen oant de trie fersliten,
yn it lêste hûs klinkt klacht nei klacht,
dan krûpt de wein, in drege rite.
Mar sjoch, ’t ferline kin noch boeie:
oer it wetter stiet in beam
dêr’t oan de tûken blommen bloeie.
maart 19, 2017
Seppelin
fan ûnbekend*
fan ûnbekend**
Graf Ferdinand von Zeppelin,
fan adel en mei sûn ferstân,
ek mei de heechste rang yn ’t leger,
hie yn ’t libben foar de wyn
en socht it fleanend heger.
Hy seach yn Frankryk in ballon
dy’t troch de loft foer mei de wyn
en liet him dêrtroch ynspirearje,
tocht ek oan Napoleon,
dus koe it net mislearje.
Sa boude hy de seppelin
mei wetterstof dy’t hichte hold
en earst in protte ûngemakken;
sûn ferstân hie dochs wol sin,
hy kriich de guit te pakken.
‘Graf Zeppelin’, in reuzeskip
foer letter om de hiele wrâld,
in reis fan ienentweintich dagen,
foar Graf Zeppelin mei stip
in ear om nei te dragen.
* Foto ‘Graf Ferdinand von Zeppelin’