februari 19, 2025
fan ûnbekend*
fan ûnbekend**
Europa, hearsker oer de wrâld
al silend oer de oseanen
mei de flaggen klappend wapperjend
as wiene it kanonnen…
bist noch te hearren en te sjen?
Amearika hiest yn de macht,
al lietst dyn ynfloed sjittend jilde
en dyn hannen klappend wapperje,
hiest neat mei yndianen…
der gie doe noch gjin slach ferlern.
Europa, lannen dy’t lykas
Amearika feriene binne
mei de blauwe flagge heech yn top,
slaan no ek op ’e tromme,
wês net benaud en lit dy sjen!
Frede komt net mei de bek
yn beide hannen, bûten sinnen,
stjerren, strepen klappe wapperjend
de swakke by de tafel
wei, gean foar nimmen op ’e rin.
* Foto ‘Flagge fan Europa’
** Foto ‘Flagge fan de Feriene Steaten’
februari 17, 2025
fan ûnbekend*
fan ûnbekend**
Piloaten binne der by ’t soad,
se komme yn ien ding oerien:
de hichte is har elemint
dêr’t sy geregeld yn ferkeare,
ien piloat is fier nei boppen gien.
Net heger fleach er as in oar,
wol gie syn eachopslach omheech
om nei in fleanend ding te sjen
dat hy besocht om thús te bringen,
mar dat wie foar ien piloat te dreech.
Hy lei it byld oan oaren foar
sa’t hy it boppe fêstlein hie:
in platte fûgel yn de flecht
sa’t dy net foarkaam op ’e ierde,
mei de namme wie men út ’e rie.
In UFO út it fierste oard,
dat kamen se al gau oerien,
mar wie it wol in elemint
om mei op ierde te ferkearen?
Kenneth Arnold hat foar wierheid stien.
* Foto ‘Publisiteit oer de UFO’
** Foto ‘De UFO’
